Tibb Universitetinin Şüa diaqnostikası və terapiyası kafedrasının müdiri və radioloq Sultanova Məlahət-in koronavirusla bağlı fikirini nəzərinizə çatdırırıq:
"Aprel ayının 1-də koronavirusla ilk tanışlığım başladı..... ATU-TCK... Bizim hər səhər daxil olduğumuz xəstəxananın divarları bu həyatı sanki iki yerə ayırıb: ondan kənardakı və ondan içəridəki dünya. Bir bilsəniz, bu iki dünya bir-birindən necə kəskin şəkildə fərqlənir. O divarlardan içəridə xəstəlik var, ağrı var, əzab var, bir qurtum nəfəsə möhtaclıq var, ölüm var. O divarlardan çöldəki dünyada isə nə yazıq ki, inamsızlıq var, bütün dünyanın düçar olduğu bəlayla zarafat var. Gedişat sübut elədi ki, bu iki dünyadakı yaşam bir-biriylə düz mütənasibdir. Çöldəki inamsızlıq artdıqca içəridəki əzab çəkənlərin, ölənlərin sayı sürətlə çoxaldı.
Əvvəllər yaşlı və əlavə xəstəlikləri olanlardan qorxurduq ki, risk qrupundadırlar. Cavanlar və immuniteti güclü insanlar daha tez öhdəsindən gəlirdi. Bir radioloq olaraq hər gün izlədiyim onlarla virusun əlində sıradan çıxmış, funksiyasını itirmiş ağciyərlərin son halları artıq kabusuma çevrilib. Buna dözmək mümkün deyil. Hamilə, qoca, uşaq, gənc, xəstə, sağlam... Bu bəla heç kimi tanımır, tanımaq istəmir! Amma biz onu tanımalıyıq! Biz onu ciddiyyə almalıyıq! Biz hər kəsi bu virusdan qorumalıyıq! Çünki biz nə qədər zarafat eləsək də, virus zarafat eləmir. O, hər gün 300-dən çox insanı nəfəsiylə sınağa çəkir, 5-6 nəfəri aramızdan alıb aparır. Bu yay günündə evdə qalmaq çətindir, başa düşürük. Amma nəfəssiz qalmaq bədbəxtlikdir! Bu gün rahat aldığınız nəfəsinizin xətrinə qayda-qanunlara əməl edin. Özünüzü qoruyun! Sağlam qalın! (P.S.günlərdi içimdə yaşadığım bu hisslər rahatlıq vermir, Sizləri yaxın, cox içdən, doğma hesap ettim, bölüşmək istədim...) "
