ABŞ-ın öndə gedən təhsil qurumlarından biri olan Johns Hopkins Universitetində aparılan tədqiqatlar böyük səs-səda doğurmuşdur.
Universitetin ‘Bloomberg School of Public Health’ kafedrasının heyəti tərəfindən aparılan tədqiqat nəticəsində mini insan beyni yaradılmışdır. 350 mkm ölçüyə malik olan mini beyin induksiya olunmuş plüripotent kötük hüceyrələri vasitəsilə yaradılmışdır.
Tədqiqatın nəticəsi nələri dəyişdirəcək?
Bəs Amerikanın paytaxtı Vaşinqtonda “Amerikada Elmin İnkişafı Dərnəyi”-ndə təqdim olunan bu tədqiqatlar gələcək üçün nə vəd edir?
Tədqiqatın lideri Thomas Hartung-a görə, mini beyinlər yeni yaradılmış dərmanların qısa müddət ərzində təsir mexanizmlərini və effektlərini öyrənmək üçün əvəzedilməz vasitə olacaq.
Hartung heyvanlar üzərində aparılan təcrübələrlə təsir mexanizmki və effektləri öyrənilən və istifadəsi təsdiqlənən hər 100 dərman maddəsindən 95-nin insanlara uyğun olmadığını qeyd etmişdir. Hartungun fikrincə mini beyinlər üzərində dərmanlarla aparılan test sınaqları nəticəsində alınan göstəricilər daha yüksək ehtimalla insanlarda alınan nəticələrə uyğun olacaqdır.
Hartung həmçinin qeyd edir ki, mini beyinlər sayəsində Altsheymer və Parkinson xəstəliklərini yaxından incələmək mümkün olacaqdır.
Laboratoriyada alınan beyinlər ölçücə çox kiçikdir. Əgər misal çəkməli olsaq,deyə bilərik ki, bu beyinlərin ölçüsü ev milçəyinin gözü ilə təqribən eyni ölçüdədir. Lakin buna baxmayaraq eyni anda yüz ədəd istehsal edilə bilən bu mini beyinlər elmi tədqiqatlar üçün çox böyük imkanlar yaradır.